ROXAS CITY — Hugot karun nga ginatutokan sang pamunuan sang Teodoro Arcenas Trade Center ang presyo sang nagapanguna nga mga balaklon sa merkado ilabi pa nga epektibo na ang price freeze bangud sang public health emergency sa pungsod kasunod sang coronavirus disease 2019 (COVID-19) pandemic.
Ini makaligad nga nadakpan ni TATC market administrator Heloise Mendoza nga isa ka negosyente nga nagabaligya sang harina sa merkado ang nagpasaka sang presyo apisar may price freeze.
Sa pagpangusisa ni Mendoza, nagpasaka sang P160 nga presyo sa kada sako sang harina ang wala na ginhingadlan nga negosyante bangud retail price na ang ginsunod sini kag indi sang wholesale price.
Halin sa P765 nga original price sang Martes, nagsaka na sa P925 ang presyo sang kada sako sang harina nga ginabaligya sang negosyante sang Miyerkules.
Suno kay Mendoza, indi mahimo nga ibaligya sang negosyante sa retail price ang iya produkto kun wholesale ang pagkuha sang bumalakal bangud supisyente pa man ang pondo sang harina sa ila bodega.
Bangud sini nagahimo na sang tikang ang pamunuan sang TATC batuk sa nasambitan nga negosyante.
Nagpanawagan man si Mendoza sa publiko nga ipalab-ot sa mga otoridad ang ila mahibaluan nga pagpang-abuso sang pila ka mga negosyante nga nagapinasaka sang presyo sang ila mga baligya sa pihak nga epektibo na ang price freeze.#
