ROXAS CITY, CAPIZ – Indi magpati ang No To PUV Phaseout Coalition nga indi mahimo sang gobyerno ang pagkakas sang value added tax kag excise tax sa petroleum products kasunod sang mataas nga presyo sang gatong.
Sa interview sang Bombo Radyo kay Mr. Elmer Forro, Lead Convenor sang No To PUV Phaseout Coalition, iya ginpahayag nga madugay na nga panawagan sang sektor sang transportasyon ang pagkakas sang buwis sa gatong apang wala sila ginapamatian sang gobyerno.
Suno kay Forro, ang ginaplano nga paghatag sang fuel subsidy sa mga public utility vehicle drivers ang isa gid lamang ka short term solution kag indi man ini mapatuman bangud sa nangin pahayag ni President Ferdinand Marcos Jr. nga indi pa ini kinahanglan bangud wala man nagataas ang presyo sang mga balaklon.
Pahayag niya, kun indi mapatuman ang pagkakas sang value added tax kag excise tax , panigurado nga ma-eksperyensyahan sa gihapon sang mga drivers ang mataas nga presyo sang gatong.
Una na nga ginpahayag ni Department of Energy Officer in Charge Sharon Garin nga ang Kongreso ang may yara sang gahom sa pag-suspend, pag-reduce kag pag-abolish sang buwis.
