ROXAS CITY – Dakop ang number 1 most wanted person sa siyudad sang Roxas matapos ginserbihan sang mandamiento de aresto sang mga katapu sang Roxas City Police Station sa Carles, Iloilo.
Ginkilala ang nadakpan kay John Michael Aranza, 33 anyos sang Barangay Baybay, Roxas City nga akusado sa kaso nga Murder.
Ang warrant of arrest ang ginpapanaog kag ginpirmahan ni Judge Eduard Contreras sang Regional Trial Court, Branch 19, Roxas City.
Suno kay Police Master Sergeant Ramil Arcangeles, tagpamaba sang Roxas City PNP, halos 16 ka tuig na nga ginaayam sang mga kapulisan si Aranza nga nagpanago matapos nakomiter ang nasambit nga krimen sadtong tuig 2003 kun sa diin ginbuno-patay sini ang biktima nga si Henry Bernada.
Kasubong nagabutan naman sang tunok sa dughan ang utod sang biktima nga si Michelle Bernada Arcega matapos nga nadakpan na sang mga kapulisan ang suspek sa pagbuno-patay sa iya nga manghod.
Suno kay Michelle nga ginpasa-Diyos na lamang nila ang hustisya sa kamatayon sang iya manghod.
Aminado man ini nga sang iya nakit-an ang suspek, kasubong nagbalik ang tanan nga sakit nga iya nabatyagan sang ginpatay ang manghod sini.
