ROXAS CITY – Nagdangat na sa 14 nga mga investor ang nagpasaka sang panumbungon nga estafa in relation to PD 1689 laban sa recruiter sang FOREX Investment Scheme nga si Lourdes Bulaqueña Baarde kag apat nga mga kaupdanan sini.
Sa bulig sang Criminal Investigation and Detection Group (CIDG) Capiz sa diin nagdangup ang mga complainant natigayon na nga mapasaka ang nasambit nga panumbungon batuk kay Baarde nga ginatudlo nga nagrecruit sa ila kag nag-isyu sang talbog nga tseke.
Suno kay Chief Inspector Chris Arthemius Devaras, pinuno sang CIDG-Capiz, magluwas kay Baarde nga ginbansagan FOREX Investment Scheme queen kalakip man sa ginpasakaan sang kaso nga estafa in relation to PD 1689 sanday certain Joel, kag tatlo ka iban pa nga ginaalegar kaupod ni Baarde sa pagpanunto sa mga investors.
Samtang matapos nga nag-atras na si Atty. Jose Villanueva bilang abugado ni Baarde, wala na sang ideya ang mga investors kun sin-o ang ila kontakon para pangayuan sang mga updates sa ila nga mga reklamo.
