Nagsaka pa sa 90 ang nabalita nga napatay bangud sa pagpanglaslas sang Bagyong Kristine sa pungsod.
Suno sa National Disaster Risk Reduction and Management Council (NDRRMC), nagapaidalom pa sa validation ang nasambit nga numero sang mga napatay.
Samtang may nabalita man nga 36 nga nadula samtang 71 ang mga nagkalapilasan.
Nagdangat naman sa masobra isa ka milyon ka pamilya ukon baylo sang masobra 5.7 milyon ka indibidwal ang apektado sang bagyo halin sa 71 probinsya sa pungsod.
Sa nasambit nga numero, masobra 382,000 indibidwal ang temporaryo nga nagatinir sa nagkalain-lain nga evacuation centers sa pungsod.
Samtang, base sa datos sang NDRRMC, nagdangat na sa ₱1.4 billion ang balor sang nabalhag nga kahalitan sang bagyo sa sektor sang agrikultura samtang masobra ₱825 million naman sa imprastruktura.
