ROXAS CITY – Ginbasura sang Office of the Ombudsman ang ginpasaka nga panumbongon nga paglapas sa Republic Act 3019 ukon Anti-Graft and Corrupt Practices Act, Republic Act 9184 ukon New Government Procurement Act, Republic Act 7080 ukon An Act Defining and Penalizing the Crime of Plunder kag Article 217 sang Revised Penal Code ukon Malversation of public funds and property batok kanday anay Governor Esteban Evan Contreras, Edwin Chinel Monares, Dr. Edmarie Tormon kag NGB Marketing nga ginapanag-iyahan ni Nizza Billedo bangud sa kakulangon sang merito kag hurisdiksiyon.
Sa ginpagguwa nga 28 ka panid nga desisyon sang Office of the Ombudsman, ginapahayag diri nga napaslawan nga mapamatud-an Sangguniang Panlalawigan nga may yara sang iregularidad sa paggamit sang pondo sang gobyerno-probinsiyal sa pagbakal sang medical, dental and laboratory supplies nga nagabalor sa P242,590,000 nga gin-alegar sang bise gobernador kag SP Members nga kasubong ginpaagi sa reimbursement purchase.
Suno sa desisyon sang Ombudsman, nga wala ini sang may nakita nga anomaliya sa pagamit sang pondo pinaagi sa pagbakal sang bulong kag wala man sang kamatooran ang gina-alegar overpricing.
Gintumod pa sang Ombudsman ang nangin findings sang COA sa diin ang nakapagkit lamang diri amo ang problema sa inventory kag wala sang na-mention nga korapsiyon nga natabo sa nasambit nga transaksiyon.
Sa pihak nga bahin, ginbali man sang Ombudsman ang alegasyon sang mga SP Members nga may yara sang natabo nga hungod nga splitting of contracts sa pagbakal sang dialysis Package A nga nagabalor sa P5,728,000 kag Dialyzer with surface Area nga nagabalor sa P1,499,000 nga ginpaagi sa small value procurement sa diin ang kontrata ang nakuha sang NGB Marketing.
Ginpatpat sang Ombudsman nga sang tuig 2021 sa diin natabo ang procurement, ang bilog nga pungsod ginpaidalum sa state of public health emergency bangud sa mataas nga kaso sang COVID-19 rason nga ang madasig nga pagsabat sa kinahanglanon sang mga pasyente ang dapat nga hatagan sang prayoridad.
Dugang pa sini, apisar nga pwede himuon sang provincial government ang emergency procurement, apang ginpakamaayo sa gihapon nga ipaidalom sa negotiated small value procurement sa diin nasunod man diri ang nagakaigo nga procurement process kag nahatagan oportunidad ang iban nga suppliers nga makapasakop sa bidding para mapasiguro nga may yara sang competitive bidding kag wala sang favored-supplier.
Kabaliskaran sang gina-alegar sang mga SP Members nga ginpaboran ang NGB Marketing nga ginapanag-iyahan ni Nizza Billedo.
Samtang, ginsupla naman sang Office of the Ombudsman ang alegasyon sang mga complainant-SP Members nga may yara sang nakomiter nga krimen nga plunder kag malversation of public funds si anay Governor Esteban Evan Contreras sa paggamit sang P242,590,000 nga ginapahayag wala ma-account bangud suno sa ombudsman, ang findings gid lamang sang COA nagahambal nga may problema lamang sa inventory kag wala ini nagpahayag nga may yara sang iregularidad sa paggamit sang pondo ukon ano man nga sahi sang korapsiyon.
Lakip man sa ginbasura sang Office of the Ombudsman amo ang administrative complaint for Conduct PreJudicial to the Best Interest of the Service, Dishonesty, Grave Misconduct, Gross Neglect of Duty & Inefficiency and Incompetence batuk sa anay gobernador.
Gindismiss man ang criminal complaint batuk sa NGB Marketing for lack of Jurisdiction.
