ROXAS CITY – Nangin mabinungahon ang ginpatigayon nga On-site Inspection sang mga katapo sang Sangguniang Panlalawigan sa Panay Quality Motors Services.
Sa ginpatigayon nga inspeksyon, nahinalaan ang pila ka mga concern sang mga katapo sang Public Transport Sector angut sa bag-o nga Motor Vehicle Inspection System (MVIS) sang Land Transportation Office (LTO) kag Department on Transportation (DOTr).
Sa interview sang Bombo Radyo kay Board Member Jonathan Sonny Besa, Chairman sang Committee on Transportation nga magapapasar ang mga ini sang resolusyon nga maga-request sa DOTr, LTO kag Panay Quality Motor Services (PMQS) nga temporaryo nga igapaiway ang implementasyon sang amo nga programa kag pag-iban sa mga parte sang salakyan nga pagatsekyaron agud nga mabuhinan ang pagsuluktan.
Dugang pa ni Besa nga ila man pagahinyuon nga pagatugutan ang change venue kun sa diin sarang makapa-renew sang rehistro ang tag-iya sang salakyan sa iban nga lugar.
Mahibaluan nga sa nauna nga committee hearing, gin-aprubahan sang Panay Quality Motors Services ang pagpaiway sang Re-Testing fee kag ini maga lawig tubtob subong nga tuig.
Ginklaro naman sang mga katapo sang Sangguniang Panlalawigan nga wala sila nagapamatok sa bag-o nga pagsulundan sang LTO kundi luyag lang nila mabuligan ang sektor sang transportasyon nga labing apektado sang amu nga sistema.
Sa karon, samtang wala pa sang desisyon ang DOTr kag LTO maga pabilin nga P1500 sa mga four-wheels nga salakyan, P600 sa mga Tricycle kag Motorcycle kag P300 sa mga Public Utility Jeepney(PUJ) ang pag suluktan sa Testing fee sang mga salakyan.
