ROXAS CITY – Aprubado na sang Sanguniang Panlungsod, ang P55K nga bonuses para sa mga empleyado sang Roxas City Government.
Sa interview sang Bombo Radyo sa pinuno sang Roxas City Communications Group nga si Mr. Melvin Galagate, ginpahayag sini nga magluwas sa bonus magabaton man ang mga empleyado sang tig-25kgs nga bugas.
Suno kay Galagate, 2,082 tanan nga mga empleyado ang magabaton kung sa diin 622 diri ang mga regular employees, 535 ang contract of service kag 927 nga mga job orders.
Ginalauman nga ini an g mabaton subong nga semana apang ang bugas nasuguran na sa pagpangtan-ay sadtong Lunes.
Ang nasambit nga pondo ang ginkuha sa maintenance another operating expenses, kag kita nagikan sa mga economic enterprises.
Ginpahayag man sang head nga ginhimo ini ni Roxas City Mayor Ronnie Dadivas, bilang pasalamat kag award sa mga empleyado bangud sa pagpanikasog kag suporta matapos nga makakuha sang madamo nga pasidungog subong nga tuig.
Matandaan nga ginpasidunggan sang Department of Trade and Industry ang syudad bilang Most Competitive City sa component city category, Top Performer sa Local Government and Finance sa idalum sang Department of Budget and Finance, Top 10 Performing City nagikan sa Department of Interior and Local Government, ginpasidunggan man sang Department of Tourism Region VI ang syudad sang Pagdayaw Award kag Kalasag Awardee sang National Disaster Risk Reduction and Management Office.
Bangud sini, dako ang ila pagpasalamat sa alkalde sa indi matupungan nga pagpalangga kag pagserbisyo nga ginahatag sa tanan.
