Kasubong sa health sabotage ang ginahimo sang mga katapu sang Sangguniang Panlalawigan sa ila nga pag-ipit sa supplemental budget sang Roxas Memorial Provincial Hospital sa diin ginpa-in lamang sa nabilin nga tatlo ka bulan sang tuig 2021 ang gin-aprubahan nga pondo para sa sweldo sang mga empleyado sang ospital.
Ginpahayag ni Governor Esteban Evan Contreras II nga klaro nga may lamud pamulitika ang nangin tikang sang sanggunian bangud kasubong nga ginahingabot ang iya administrasyon nga nagahimo lamang sang ila obligasyon nga mabuligan ang mga pumuluyo kag mabalikan ang mga sakripisyo sang mga frontliners nga nagatatap sa mga pasyente nga nagpositibo sa COVID-19.
Suno pa sa opisyal nga nagasalig ini sa mga department heads kag mga chief of hospital nga katuwang sini sa paghatag sang health services sa mga Capizeño nga nagadangup sa RMPH.
Kuntani mabatyagan man sang sanggunian ang kabudlay kag pagsakripisyo sang mga frontliners nga nagarisgo sang ila kabuhi agud lamang mahatagan sang serbisyo ang mga pasyente nga wala sang iban nga dangpan kundi ang RMPH.
Ginkumpirma man ni Governor Contreras nga natigayon na sini mapalab-ot sa palasyo sang malakanyang ang nagakahinabo nga pagpang-ipit sang sanggunian sa pondo sang RMPH nga gamiton sa pasweldo sang mga frontliners.
Naghinyo man ini sa sanggunian nga ipaiway ang pamulitika kag magbuligay sila para sa mga pumuluyo.
Ginpasiguro man sang amay sang probinsiya nga handa ini magpapreso pananglitan mapamatud-an sang sanggunian nga may iregularidad ukon ghost employees sa RMPH.
