ROXAS CITY, CAPIZ- Gin-athag sang pamunuan sang Traffic Management Unit Roxas City ang hanungod sa pagserbe sang warrant of arrest para sa mga nagabayolar sa ‘No Helmet, No Driving Policy’ nga traffic rule.
Ini ang kasunod sa natapos nga pagka-aresto sang isa ka indibidwal sa banwa sang Panay sa diin nga nag-angkon ini sang nagkalain-lain nga mga komento.
Sa interview sang Bombo Radyo kay Mr. Gonzalo Andrada, Head sang Traffic Management Unit Roxas City, iya ginpakigbahin nga ang pagserbe sang warrant of arrest para sa nagalapas sa amo nga patakaran ang naga-agi sa insakto nga proseso.
Una, sa tion nga madakpan ang isa ka motorista nga nakabayolar sa amo nga patakaran, gina-impound ang behikulo sini sa diin nga may lima ini ka-adlaw nga palugit para sa pagbayad sang nagakaigo nga penalidad. Masunod, pananglitan nga indi makabayad ang amo nga motorista sa sulod sang lima ka-adlaw, ginasekyar ini sa City Treasurers Office, kag kun wala pagid ini kabayad, makuha na ang talatapan sang certification sa diin nga magadihon na sila sang affidavit para sa nakadakop nga enforcer. Pagkatapos sang amo nga tikang, ipasaka ini sa City Fiscals Office agud nga mahatagan pagid sang kahigayunan ang amo nga motorista kag kun wala pagid ini nakighinun-anon, diri kag magaserbe na sang warrant of arrest ang mga katapo sang Traffic Management Unit.
Magluwas diri, gin-athag man sang pamunuan nga patas ang pagtratar kag pag-implementar sang amo nga patakara, mapa-lalaki man ukon babaye.
Pahayag pa ni Gonzalo, nga indi gid nila luyag kuntani nga magpandakop apang kun ang mga motorista nagabayolar, ginasiguro gid nga mahatagan sang nagakaigo nga aksyon rason nga mensahe sini para sa ila nga magsunod kuntani sa mga patakaran agud malikawan ang kasubong nga hitabo.
Interviewed by Bombo Sunnie Mae Constantino Batencila
