ROXAS CITY – Ginadumilian sang Commission on Election (COMELEC) ang pagsuksok sang campaign T-shirt ukon may yara sang imprinta sang pangalan sang isa ka kandidato sa mismo nga adlaw sang eleksyon.
Sa interview sang Bombo Radyo kay Atty. Rommel Benliro, City Comelec Officer suno diri, mahimo nga makasuksok sang bisan ano nga duag ukon color sang tshirt ang mga botante apang siguraduhon lamang nga wala sang mga tinaga nga naga-singitan nga botohon ang isa ka kandidato.
Sa pihak nga bahin, ginpahayag sang opisyal nga 906 ka mga bulothuan ukon polling precincts ang pagagamiton sa bug-os nga probinsya sang Capiz.
Magapatigayon man ang komisyon sang final testing and sealing sa Mayo 7, sabado sa tanan nga kabanwahan agud masiguro nga wala sang aberya sa adlaw sang eleksyon.
Samtang, wala gina-required ang pagsuksok sang face shield kag indi naman kinahanglan nga magpresentar ang isa ka botante sang vaccination card kag RT-PCR test antes magboto.
Panugyan ni Benliro sa tanan nga mga botante ang tama nga pagsuksok sang face mask kag mahimo nga ipatuman ang 1 meter nga social distancing.
