ROXAS CITY – Nagapati ang pamilya ni Rio Posadas Borleo nga nasapwan-patay sa Circumferential Road, Barangay Dayao nga ginkastigo anay antes ginluthang ang ila himata.
Sa interview sang Bombo Radyo kay Jopay Posadas, hinablos sang biktima, ginpahayag sini nga sang nagpadulong sila sa Morgue agud makita ang bangkay sang iya tiyo, nakit-an nila ang mga samad kag gasgas sa lawas nga kaangay ginkastigo anay ang biktima antes ginluthang-patay.
Suno kay Jopay nga naga-extra panagat ang tiyo sini sa nasambit nga port kag ginkakibot lamang nila ang natabo bangud nakapauli pa ang biktima sa President Roxas tatlo ka adlaw ang nakaligad antes ini nasapwan nga wala na sang kabuhi sang Pebrero 14 sa Circumferential Road sa Barangay Dayao.
Dugang pa sini nga mabuot ang pagkakilala sini sa iya tiyo kag ginakabig niya ini nga amay.
Sa karon hustisya ang ginasinggitan sang ila pamilya kag nakapakig-angut naman ang mga ini sa mga otoridad angut sa imbestigasyon sang nasambit ng insidente.
