Ginabasol sang pamilya sang 22-anyos nga security guard ang nagalaylay nga kable sang telecommunications company kag ang nagahilay nga poste sa kamatayon sang ila himata.
Ginpahayag ni Catherine Villas, pakaisa sang biktima nga si John Paul Torreon sang Barangay Maninang, Sapian, Capiz nga ginkuha na ang nagahilay nga poste bangud may yara na sang napatay.
Kuntani gin-aksyunan na sadto pa ang ginareklamo nga nagahilay nga poste kag nagalaylay nga kable agud wala sang kabuhi nga madula, apang ginhulat pa nga may mapatay antes maghimo sang aksyon.
Ginlaragway sini ang pakaisa nga mapinalanggaon nga amay sa duha ka mga kabataan kag mabinuligon.
Nahibaluan nga magapadulong sa iya gina-ubrahan bilang isa ka security guard ang biktima sakay sa motorsiklo apang pag-abot sa Sitio Angkin, Barangay Poblacion, Sapian, aksidente nga nasangit ang iya nga liog sa nagalaylay nga kable sang isa ka telecommunications company sang nagahilay nga poste.
Gindala pa ini sa ospital, apang gindeklara nga dead on arrival sang doktor.
Samtang ginpaidalum na sa post mortem ang bangkay sang biktima kag pasalamatan sang pamilya kun may ihatag nga bulig ang tagdumalahan sang telecommunications company.
