Preparado na ang bug-os nga pamunuan sang Barangay Baybay, Roxas City para sa pagapatigayunon nga Traslacion 2026.
Sa interview sang Bombo Radyo kay Punong Barangay Erwin Oroceo, iya ginpahayag nga ini ang tuigan na nga hilikuton sang ila nga barangay agud nga ipakita ang ila pagka-deboto kay Hesus Nazareno.
Suno sa iya, maga-assist ang tanan nga katapo sang ila barangay kaupod ang traffic management unit sang syudad sang Roxas agud mapabilin ang maayo ang lakat sang trapiko samtang ginapatigayon ang nasambit nga aktibidad.
Pahayag pa niya, maga-umpisa ang traslacion alas-tres sang hapon sa adlaw sang Huwebes, gikan sa Immaculate Conception Metropolitan Cathedral tubtob sa Mission Station sang Barangay Baybay, Roxas City.
Samtang, nagalaum man ini nga maga-ugyon ang manami nga panahon agud nga indi ma-delay ang pagpatigayon sang amo nga traslacion.
Gina-agda man sang natungdan ang tanan nga Capiznon nga mag-upod sa traslacion 2026 kag ipakita ang hugot nga pagtuo.
