Wala na ginahatagan atensyon sang Capiz State University ang pag angut sa Dumarao Campus nga gina-akusaran may nagakatabo nga recruitment para mangin miyembro sang CPP/NPA
Sa interview sang Bombo Radyo kay Dr.Editha Alfon presidente sang unibersidad nga wala na sila makibot ukon matingala nga nadala ang Capsu Dumarao sa mga eskwelahan sa Pilipinas nga ginaangut sa rebelde.
Suno pa kay Alfon nga sang nagligad nga report sang PNP tatlo ka mga campuses sang Capsu ang ila ginpangtudlo ang Pilar, Dumarao kag Tapaz Campus.
Dugang pa sini nga wala sang kamatuoran ang amu nga alegasyon rason nga nagpatigayun na ang eskwelahan sang imbestigasyon kag nagapadayon sa karun ang ila monitoring sa ila mga estudyante, ilabi na ang mga nagapauli sa mga upland barangay,
Pahayag pa ni Alfon nga wala na sila sang mga pagahimoon nga aksyon agud madula ang unibersidad sa ila nga listahan, bangud wala man ini sang kamatuoran kag mas madamu nga mga bagay nga importante ang kinahanglan unahun kag hatagan sang pagtamod.
Samtang magakooperar naman ang pamunuan sa unibersidad kun magpatigayon gid man sang imbestigasyon ang kapulisan kag militar.
