ROXAS CITY – Ginkompirmar ni Panay Sangguniang Bayan (SB) Paulo Besa ang plano sang lokal nga gobyerno sang Panay nga pagbakal sang duta nga pagatukuran sang Motorpool sang nasambit nga banwa.
Sa interview sang Bombo Radyo, ginpahayag ni Besa nga una na nga nagpatigayon sang committee meeting ang Committee on Infrastructure sang konseho sang banwa kun sa diin nahinalaan ang ginaduso nga resolusyon para sa pagbakal sang nasambit nga duta.
Apang ginkwestiyon ni Besa ang nasambit nga plano bangud kasunod sang committee hearing, wala man sang may gin-presentar nga committee report sa konseho.
Luyag kuntani ni Besa nga usisaon ang titulo sang duta, tax declaration, kag magpatigayon sang site-inspection.
Suno diri nga tuman ka importante ang committee report ilabi pa nga ang kwarta nga gamiton sa pagbakal sang duta ang indi kwarta sang mga opisyales kundi kwarta sang pumuluyo.
Ginpanindugan sini nga bilang miyembro sang konseho sang amo nga banwa, trabaho sini nga mag-check and balance sa anuman nga ginagastuhan sang lokal nga gobyerno.
Apang bangud majority sa gihapon sang konseho ang nagapabor sa amo nga resolusyon, kasubong wala ginpamatian ang mga palamangkutanon ni Besa.//
Suno kay Besa nga na-capital outlay naman ang pagbakal sang amo nga duta.
Mahibaluan nga ang nasambit nga duta ang ginapahayag ginapanag-iyahan ni former Mayor Vic Bermejo.
Gindugang pa sang opisyal nga ang nasambit nga duta ang may kalaparon nga kapin 2, 000 square meters nga pagabaklon sang lokal nga gobyerno sang banwa sang kapin 4 tubtob 5 milyones pesos.
