ROXAS CITY – Ginakahangaw-an sang pila ka residente malapit sa suba sa bahin sang Poblacion Ilaya kag Barangay Matagnop sa banwa sang Dao ang padayon nga paglapad sang Panay river.
Sa interview sang Bombo Radyo sa pila ka residente, ginpahayag ni Marites Alvarez, nga ginakulbaan sila sa tion nga magbubo ang mamunog nga ulan sa ila lugar bangud may posibilidad nga malab-ot ang ila balay nga madala sa pagkatiphag.
Ginbisitahan naman ini suno diri sang ila nga Municipal Engineer apang wala man sang abiso pa nga kinahanglan na nila magbiya sa ila nahamtangan.
Suno naman kay Barangay Kagawad Arnolfo Abawan, nga nagsugod sa pag-ab-ab ang suba kag naguba ang porsyon sang river control sang nagbaha sang tuman ka dalom tuga ni bagyong Agaton.
Ginabulubanta nga 10 tubtob 20 metros na ang gin-ab-ab nga duta sang suba sa orihinal sini nga kalaparon.
Ginapahanumdoman nalang nila ang mga residente sa ila mga nasakupan nga barangay nga mangin alerto bangud sa sitwasyon sang nasambit nga suba.
Nahibaluan nga kaangay man ini sa sitwasyon sang Panay river nga sakup sa banwa sang Panit-an apang ang kinalain bangud gin-abisuhan didto ang mga residente nga mag-evacuate na.
