Patay ang isa ka tricycle driver matapos ginapahayag nabungguan sang salakyan ang ginamaneho sini nga traysikol sa Barangay Viscaya sa banwa sang President Roxas.
Ginkilala ang biktima nga Ryan Detaro, 33-anyos kag residente sang Barangay Ibaca sang nasambit nga banwa, samtang ang drayber naman sang salakayan ang ginkilala kay Phzylle Crispolon, 34-anyos, residente sang Barangay Poblacion, Pilar, Capiz.
Sa nakuha nga impormasyon sang Bombo Raydo nagikan President Roxas Municipal Police Station, ginpahayag nga padulong kuntani sa banwa sang Pontevedra si Detaro sang hinali nalang ini nabunggoan sang salakyan nga kasugata sini nga ginamaneho naman ni Crispolon.
Ginapahayag nga nadulaan sang control sa pagmaneho sang salakyan si Crispolon rason nga nang-agaw ini sang linya sang karsada kag didto na-timingan nga nagapadulong man ang trisikol ni Detaro. Naapok sa karsada kag nag-angkon sang patal nga pilas sa lawas ang biktima nga gilayon naman nga ginpadangat sa Bailan District Hospital apang ginbawian ini sang hulam nga kabuhi.
Sa karon, yara na sa kustodiya sang President Roxas si Crispolon kag ang duha ka mga behikulo para sa nagakaigo nga disposisyon.
