Gin-anunsyo sang Philippine National Police (PNP), nga nangin malipayon kag matawhay ang pagsaulog sang Christmas Eve sa nagkalain-lain nga panimalay kag simbahan sa bug-os nga pungsod.
Suno kay PNP acting chief Police Lt. Jose Melencio Nartatez Jr., wala sang may narekord nga insidente may kaangtanan sa misa bangud sa disiplina sang publiko kag madasig nga presensya sang kapulisan.
Madumduman nga ginpahamtang ang mga pulis sa mga simbahan, mga terminal sang transportasyon, kag mga mayor nga lugar sa diin ginasaulog sang mga Pilipino ang Krismas agud masiguro ang kaluwasan sang publiko.
Ginpahayag ni Nartatez nga wala untat ang ila pagbantay humalin sang Disyembre 16, para sa pagsugod sang Simbang Gabi.
Naka-Heightened police visibility man sa gihapon ang hanay sang kapulisan sa bug-os nga paskwa, lakip ang pagsugata sa bag-ong tuig.
Gindayaw man ni Nartatez ang kooperasyon sang mga simbahan, lokal nga gobyerno, mga volunteers, kag mga pumuluyo sa pagmintinar sang kalinong, kag gin-engganyo ang tanan nga magselebrar sang malipayon apang sa luwas nga paagi.
