ROXAS CITY – Temporaryo nga ginpasarado anay ang pila ka mga comfort room sa Roxas City Integrated Transport Terminal sa Pueblo de Panay, Barangay Lawaan sining siyudad.
Ini ang ginpahayag ni terminal administrator Mr. Victor Arcenas sang mainterview sang Bombo Radyo.
Suno kay Arcenas nga temporaryo anay ginpasarado ang pila ka mga banyo sang amo nga terminal bangud ginapahayag nga may yara ini sang problema.
Ginpahayag sini nga nag request na sila kay City Mayor Ronnie Dadivas nga magpangita sang sanitary engineer agud nga pakaayuhon ang mga CR sa nasambit nga terminal.
Bangud diri, ginpaabot na ini sa talatapan sang city engineer’s office agud mahatagan sang solusyon ang nasambit nga problema.
Samtang, gin-athag naman ni Arcenas nga may yara pa man sang nabilin nga mga banyo para sa babaye kag lalaki nga sarang maggamit sang mga pasahero sa nasambit nga terminal.
Matandaan nga madamo sang mga pasahero ang nagpalab-ot sang ila reklamo matapos nga ginpasarado ang pila ka mga banyo sa nasambit nga terminal.
