ROXAS CITY – Ginkadismaya sang isa ka ginikanan ang nasaksihan sini sa ginpatigayon nga aktibidad sa Congressman Ramon A. Arnaldo High School (CRAAHS) sa Barangay Banica, sining siyudad sa diin may mga manunudlo nga ginaalegar hubog samtang nagapadayon ang ila nga event.
Ginpahayag sang wala na ginhingadlan nga ginang, nga magluwas diri, may nakit-an man siya nga hubog nga mga estudyante nga ginapatihan nakaupod pa sa imnanay sang nasambit nga mga manunudlo sa sulod mismo sang eskwelahan.
Bangud diri, gindangop sang nasambit nga ginang sa Bombo Radyo ang iya nasaksihan agud mapasabat ang pamunuan sang nasambit nga eskwelahan.
Sa interview sang Bombo Radyo, aminado si Mr. Rodrigo Jeremias, school principal nga may ka mga manunudlo siya nga ginsaway matapos namutikan nga yara sa impluwensiya sang makahulubog nga ilimnon apang ginpanindugan nga indi man sila sang hubog.
May estudyante man suno sa principal nga gindala sa school clinic apang sa gate pa lamang nadiskubrehan na nga nakainom ini.
Nagpanindugan man si Jeremias nga wala sang imnanay nga natabo sa mga estudyante kaupod ang mga manunudlo sa sulod sang eskwelahan.
