ROXAS CITY – Nagpaathag ang Municipal Administrator sang Pilar natuhoy sa ginbilin nga tourist bus sa atubang sang munisipyo sang amo nga banwa nga ginapahayag madugay na nga wala ginasapak.
Suno kay Mr. John Heredia, sang bag-o pa lamang nagsugod sa iya nga posisyon si Mayor Arnold Perez, ila ginpangtsekyar ang pila ka dokumento sang banwa kag diri ila nakit-an nga duha ka bulan antes ang 2019 midterm elections, may kontrata sa tunga sang local government unit (LGU) sang banwa kag isa ka kompaniya sang van truck.
Ang amo nga kontrata ang nagapatuhoy sa pagbakal sang banwa sang ambulansiya nga nagabalor sang kapin P4 milyones pesos.
Suno kay Heredia nga ila ini ginkatingala bangud magluwas sa tuman kadako nga pondo para diri, wala man sila sang nakit-an nga anuman nga ambulansiya sang banwa.
Bangud nasaad sa kontrata nga sa sulod sang 120 diyas igadul-ong ang ambulansiya, naghulat ang LGU sang banwa sa idalom sang liderato ni Perez kun may yara sang igadul-ong ang supplier.
Sang ila ginlab-ot ang nasambit nga supplier diri nahibaluan nga naatrasar ini bangud wala pa sang delivery rason nga ginpakamaayo sang Bids and Awards Committee sang banwa nga i-resend ang kontrata bangud sa pila ka mga bayolasyon kag ini ang gindeklarar na lamang nga ‘null and void’.
Kapin duha ka semana matapos gin-resend ang kontrata, nakibot na lamang ang mga tawo sang munisipyo sang may gindul-ong nga tourist bus sa guwa sang municipal hall.
Suno kay Heredia, may nagsaka lamang nga isa ka driver sa munisipyo kag nagbilin sang yabi kag envelope nga may unod nga rehistro.
Nasaad sa rehistro nga ang classification sang salakyan amo ang ‘tourist bus’ kag indi sang ambulansiya.
Wala man ini sang anuman nga medical equipments sa sulod nga kalakip kuntani sa gin-procure sang nakaligad nga administrasyon sa nasambit nga pondo.
Bangud diri suno kay Heredia, nagapanindugan ang administrasyon ni Perez nga indi nila ini pagbatunon bangud kun matabo, sila pa ang magapanabat sa mga bayolasyon nga nakomiter sa Commission on Audit (COA).
Ginpakamaayo na lamang nila suno kay Heredia nga ipa-blotter sa hanay sang pulisya ang natabo nga pagbilin sang nasambit nga salakyan sa guwa sang munisipyo.
