ROXAS CITY – Ginpasalig sang Provincial Internal Affairs Service sang Philippine National Police ang hugot nila nga pag-monitor sa mga kapulisan sa probinsiya sang Capiz.
Sa interview sang Bombo Radyo, ginpahayag ni Provincial Supt. Police Lt. Col. Erwin Margarejo nga ang (PIAS) ang independent kag autonomous unit sang PNP nga magdihon sang mga lihok sandig sa ila mandatu sa idalom sang Republic Act 8551.
Ginpahayag sini nga partikular nila nga mandatu amo ang pagpatigayon sang pro-active nga inspeksiyon kag audit sa tanan nga mga PNP personnel kag units.
Kalakip man sa ila nga trabaho ang pag-imbestigar sang mga complaints ukon reklamo kag pagtipon sang mga ebidensiya nga magasuporta sa ila ginapatigayon nga open investigation.
Sila man ang nakatutok sa pagpatigayon sang summary hearings sang PNP members nga nagapangatubang sang administrative charges.
Nagasumiter man ang hanay sang periodic report natuhoy sa assessment, analysis, kag evaluation sang mga kapulisan.
Nakahanda man ang PIAS sa paghatag sang assistance sa mga kaso nga ginakaulamiran sang mga kapulisan.
Tuman ka importante ang papel sang PIAS suno kay Margarejo ilabi pa nga nakatutok sa karon ang hanay sang pulisya sa ila nga internal cleansing.
Kalakip man sa ila ginatutukan ang pagpasiguro nga nagasuksok sang husto nga uniporme ang mga kapulisan kag madisiplina sa ila trabaho agud matuman ang ila mandatu bilang mga alagad sang laye.
