PONTEVEDRA, CAPIZ- Ginpatpat sang Officer-In-Charge sang Pontevedra Municipal Police Station ang mga accomplishments sang ila nga talatapan sa banwa sang Pontevedra, Capiz halin Enero tubtob Agosto 2025.
Sa interview sang Bombo Radyo kay Police Captain Gary Diaz, Officer-In-Charge sang Pontevedra Municipal Police Station, iya ginpakigbahin ang mga accomplishments sang ila nga talatapan sa diin nga nagresulta sa pagpabilin sang palibot nga malinong kag matawhay.
Sa mga nanari-sari nga mga aktibidad nga ginpatigayon sang ila nga team, nakadakop sila sang isa (1) ka mga wanted persons nga may kaso nga cyberlibel, duha (2) ka operations sa illegal gambling, kag tatlo (3) tanan ka mga armas-luthang ang boluntaryo nga ginpangsurrender sa ila sini man nga kampanya nga Tokhang Kontra Armas-Luthang (TKAL). May yara man sang isa (1) ka indibidwal ang nadakpan sa drug buybust operation sa diin nga nakuhaan ini sang 158.366 grams nga shabu nga nagabalor sang P1,706,888.50.
Dugang diri, nakadakop man sila sang 106 tanan ka mga indibidwal nga nagbayolar sa traffic rules, sa diin 36 diri ang nakabayolar sa Driving without License, 32 ang nakabayolar sa Driving without helmet, walo (8) ang nakabayolar sa Driving without Official Receipt (OR)/Certificate of Registration (CR), syam (9) ang mga menor de edad, tatlo (3) ang mga naka-open pipe, pito (7) sa obstruction kag duha (2) sa overloading.
Pag-abot sa sitwasyon sang seguridad sang banwa sang Pontevedra, yara sa maayos kag ordered nga kahimtangan sa diin nga ginakabig ini bilang isa sa matawhay nga banwa sang probinsya sang Capiz.
Bangud sa bulig kag suporta sang lokal nga gobyerno, mga barangay officials kag mga pumuluyo sang banwa, nagapabilin ang kalinong kag katawhay sa palibot.
Samtang, nagapadayon sa gihapon ang mga nagkalain-lain nga mga programa sang talatapan kaangay sang pagpanagtag sang mga informative pamphlets sa mga pumuluyo, pag-conduct sang symposium, kag baranggay visitation. Isa pagid ka programa ang sa karon nga ila ginapabaskog amo ang programa nga inisyatibo sang Philippine National Police nga 911 National Emergency Call sa diin amo ang pagpangayo sa ila sang bulig pamaagi sa pagpanawag gamit ang telepono ukon cellphone kag sa sulod sang lima ka minuto ila pagarespondehan.
Pahayag pa ni Diaz, pamaagi sa pagbinuligay sang mga otoridad, lokal nga gobyerno kag mga pumuluyo naagaresulta sa paging madinalag-on ang mga programa sang kapulisan.
Lauman naman suno sa iya nga magapadayon ang tanan nga mga aktibidad sang mga katapo sang Pontevedra Municipal Police Station agud mapabilin ang kalinong kag katawhay sa palibot sang banwa.
In an interview with Bombo Francis Biñas & Bombo Sunnie Mae Constantino Batencila
