JAMINDAN CAPIZ – Aksidente nga nasanggit sang isa ka motorsiklo sakay sang duha ka mga indibidwal ang duha ka mga katapo sang Jamindan Municipal Police Station samtang nagapatrolya kadungan sa pagsug-alaw sang Bag-ong Tuig sa plaza sa banwa sang Jamindan.
Sa interview sang Bombo Radyo sa Officer In Charge sang Jamindan MPS nga si PLT. Liberato Cagampang Jr. ginpahayag sini nga ginkilala ang mga sakay sang motorsiklo nga sanday alyas “Joe”, 24-anyos kag alyas “Mark”, 22-anyos, lunsay residente sang Barangay Esperanza sa amu nga banwa.
Samtang ang mga pulis naman nga naulamid ang ginkilala nga sanday PSSg. Ezequias Villeza kag PCpl Apolonio Llait.
Suno kay PLT. Cagampang nga samtang nagabantay sa lugar ang nasambit nga mga opisyal hinali lamang ini nga ginsanggit sang motorsiklo kung sa diin natapakan sang kariton ang tuo nga tiil I PCpl. Llait.
Bangud sini, pagadakpon na kuntani sang mga opisyal si alyas “Joe” apang sa baylo nga magsunod ini sa ila nagbato pa kabangdanan nga nagresulta sa mainit nga pagdakpanay.
Mahibaluan nga matigayon na kun tani nga madakpan si alyas “Joe” apang ginsipa kag ginpatup-an naman sang inumol ni alyas “Mark” si PSSg. Villeza kabangdanan nga nagbayluhanay na sang inumol ang magtimbang nga bahin.
Mahibaluan nga yara sa impluwensya sang makahulubog nga ilimnon ang mga sibilyan.
Sa karon, yara na ini sa kustodiya sang Jamindan Municipal Police Station kag magapangatubang sa kaso nga Reckless Imprudence Resulting in Physical Injury to a Person in Authority.
