PONTEVEDRA, CAPIZ – Patay ang isa ka pulis matapos aksidente nga nabungguan sang kasugata nga motorsiklo sa Brgy. Malag-it, Pontevedra, Capiz.
Ginkilala ang biktima kay PCPL Robert Dela Torre, 31-anyos, residente sang Brgy. Takas, sa nasambit nga banwa kag na-assign sa Regional Police Drug Enforcement Unit 6, samtang ang driver naman sang kasugata nga motorsiklo ang ginkilala kay Ceasar Merasol, 24-anyos nga residente naman sang Brgy. Solo sa amu man nga banwa.
Suno kay Police Corporal Aerrol Acerbo, imbestigador sang Pontevedra PNP, sakay sa iya motorsiklo si Dela Torre kag papuli na kuntani sa ila balay sang aksidente ini nga nabungguan sang kasugata nga motorsiklo nga ginamaneho ni Merasol.
Bangud sa mabaskog nga impact sang pagkabunggo, lunsay nga nag-angkon sang pilas sa magkatuhay nga parte sang lawas si Dela Torre kag Merasol nga gilayon naman nga ginpadangat sa magkatuhay nga ospital agud madapatan sang nagakaigo nga pagbulong.
Apang wala makaluwas sa kamatayon si Dela Torre bangud sa patal nga pilas nga iya naagom sa nasambit nga aksidente.
Samtang, yara naman nagapabilin sa ospital si Merasol kag padayon nga ginabulong.
