ROXAS CITY – Gintadlong ni Punong Barangay Alfredo Minong Albaladejo sang Barangay Tiza sining siyudad ang nagalapta nga “fake news” nga ginbawian ini sang kabuhi matapos nga nagpositibo sa COVID-19.
Sa interview sang Bombo Radyo kay Albaladejo ginpanginwala sini ang nagalapta nga balita nga napatay ini bangod sa COVID-19 apang ginklaro sini nga ang iya tiayon ang ginbawian sang kabuhi.
Apang aminado si Albaladejo nga na-admit ini sa ospital matapos nga nagsuprehir sang balatian nga Pneumonia.
Dugang pa sini nga negatibo man si Albaladejo sa rapid test kalakip na ang iya mga himata.
Sa karon, padayon ini nga ginabulong sa ospital kag natalana nga maguwa sa masunod nga semana.
Nag-apelar naman ini sa mga pumuluyo nga untaton na ang pagpalapta sang wala sang kamatuoran nga mga balita.
