ROXAS CITY – Napasakaan na sang kaso sa Office of the Provincial Prosecutor subong nga adlaw ang punong barangay sang Barangay Bongbongan, Maayon, Capiz matapos natiruhan sini ang isa ka mangunguma sa nasambit nga lugar.
Ginkilala ang biktima nga si Richard Soberano, 52 anyos, sang amo nga lugar.
Suno kay Police Captain Roger Diom, hepe sang Maayon Municipal Police Station, nagapabilin sa karon sa Roxas Memorial Provincial Hospital ang biktima matapos nakaangkon sang igu sa tiyan kag lapos sa likod tuga sang pagpangtiro sang ginatudlo nga suspek nga si Punong Barangay Edgar Ramon, 45 anyos kag residente man sang nasambit nga lugar.
Ginpahayag ni Diom nga nagkadto si Ramon sa Sitio Gumawa, sa amo nga barangay bangud luyag sini nga hitsuon ang away sa duta sang pamilya Soberano.
Apang base sa imbestigasyon nga wala nagpabor sa biktima ang ginpahayag nga eksplenasyon sang amo nga kapitan rason nga ginlabo sini ang kahoy nga ginbutang sang kapitan sa duta gamit ang dala sini nga binangon bangud sang kaakig.
Nagtuad ang nasambit nga kapitan nga kun indi pa masolusyonan ang problema, magapauli na lamang sila upod ang mga katapo sang Barangay Peacekeeping Action Team (BPAT) sini.
Apang sang nakalakat na pabalik sa Barangay Bongbongan Proper si Ramon, ginsulong ini sang biktima dala ang binangon rason nga natiruhan sang kapitan ang nasambit nga biktima gamit ang iya armas luthang.
Nagmandu man si Ramon nga ipadul-ong ang biktima sa mga tanod sini sa pinakamalapit nga ospital.
Nagpatigayon man sang hot pursuit operation ang mga kapulisan matapos ang insidente bangud wala na naabtan ang nasambit nga kapitan sa lugar.
Samtang personal nga nagpadulong sa estasyon sang pulisya ang nasambit nga kapitan agud magpablotter apang matapos ini nga nagpabalhag sang reklamo, ginhold man ini sang mga kapulisan kag ginkustodiya sa amo nga istasyon sa sulod sang 36 oras.
Gin-ako man sang nasambit nga punong barangay ang nahimo nga insidente apang wala narekober ang armas luthang.
Sandig sa ginparekord ni Ramon, .45 calibre nga armas luthang ang gingamit sini sa pagtiro sa amo nga biktima.
