Punong Barangay sang Pob. Ilaya, Panay, ginkumpirma nga indi tumandok sang ila barangay ang Army Reservist nga ginluthang-patay

PANAY, CAPIZ – Ginkumpirma ni Punong Barangay Eleuterio Dumol sang Pob. Ilaya, Panay, Capiz nga indi tumandok sang ila lugar ang Army Reservist nga ginluthang-patay sa ila barangay sang wala pa matumod nga mga suspek.

Sa interview sang Bombo Radyo Roxas kay PB Dumol, iya ginpahayag nga indi niya kilala ang biktima kag makit-an niya lang ini kun kaisa nga nagabakal sang bugas sa tiyangge kun gab-i kag nagapa-gasolina sang motorsiklo.

Suno kay Dumol, tsekyaron nila ang mga CCTV sa ila barangay agud makabulig sa imbestigasyon sang mga kapulisan.

Dugang pa sang natungdan, posible nga ginabantayan na nga daan sang suspek ang biktime.

Sa karon, padayon pa ang imbestigasyon sang mga otoridad angut sa nasambit nga insidente.