CAPIZ- Ginhinalaan na sang mga nagkalatungdan ang nasambit nga mga reklamo may kaangtanan sa ginapatuman nga Speed Limit Ordinance sa banwa sang Sigma, probinsya sang Capiz.
Sa interview sang Bombo Radyo kay Capiz Vice Governor James ‘Mitang’ Magbanua, iya ginpahayag nga nakalab-ot sa talatapan sang Sangguniang Panlalawigan ang nasambit nga mga reklamo sa diin nga ila ini nga ginhatagan sang aksyon pamaagi sa pagpatigayon sang Committee Hearing kaupod ang mga nagkalatungdan nga mga opisina kag committees nga ginapangunahan sang Committee on Transportation and Communication kag Committee on Local Government.
Dugang sini, ang nasambit nga reklamo ang sa karon yara sa idalom sang duha ka committees kag ginahulat nalang nya ang ang rekomendasyon sa nagikan diri kun ano ang mangin findings agud mahatagan sang nagakaigo nga igtalupangod.
Nahibaluan nga ginapahayag nga nagarekalmo ang pila ka mga motorista sa amo nga ginapatuman nga ordinansa sa Sigma bangud ginsiling diri nga kaangay ginhatagan sang authorization ang mga katapo sang Public Order and Safety Unit (POSU) sa pagpangdakop sa mga nagbayolar sa diin luyag ini nila nga mahatagan sang kaathagan hanungod sa sini nga hitabo.
Samtang, ang nasambit nga patakaran amo ang Ordinance No. 05, series of 2024 ukon ang “An Ordinance Setting the Speed Limit for all Kinds of Vehicles within the Territorial Jurisdiction of the Municipality of Sigma, Capiz and Providing Penalties for the Violations Thereof” nga nagasugod sang Hunyo 1, 2025.
Sa karon, ginahulat nalang ang sabat sang duha ka mga committees angut sa nasambit nga reklamo.
Interviewed by Bombo Francis Biñas
