ROXAS CITY – Ginpakigbahin sang Roxas City Government ang mga kadalag-an sang syudad subong nga tuig 2025 kag ginpasiguro ang mga residente sang padayon nga mabaskog kag mas maayo nga programa para sa 2026.
Sa interview sang Bombo Radyo kay Mr. Melvin Galagate, head sang Roxas City Communication Group, iya ginpasalig nga ang city government ang nagapabilin nga committed sa pagserbisyo sa mga tawo kag ginasiguro nga ma-address ang ila kinahanglanon.
Suno kay Galagate, naga-focus ang city government sa proyekto nga maka-improve sa pang-adlaw adlaw nga pagpangabuhi kag makabulig sa komunidad.
Pila sa mga achievements sang city government subong nga tuig amo ang pag-improve sa dalan, lakip na ang asphalt overlay sa Barangay Dayao nga madugay man nga nangin problema sang mga motorista.
Nag-impove man ang sanitary landfill sang syudad sa diin apisar nga puno na ini kag gintambakan sang duta, gin-ideyahan ini kag gintamnan sang greenery agud mangin matinlo, mangin mas mapuslanon kag mas environment-friendly.
Pahayag niya, dako man ang nabulig sang Command Center sa Barangay Inzo kun disaster response kag emergency situations ang istoryahan.
Padayon man ang city government sa school development projects, lakip na ang pagkaayo kag improvement sang mga eskwelahan kag classrooms agud mahatagan ang mga estudyante sang maayo nga venue sa pagtuon.
Dugang pa sang natungdan, ang pag-umwad sang Roxas City ang nangin mas visible sa termino ni Mayor Ronnie Dadivas kag ginahandum pa gid ang pagtukod sang “bigger, better, brighter kag more livable” Roxas City sa mga masunod pa nga tuig.
