ROXAS CITY – Ginapadalman sa karon sang kapulisan ang imbestigasyon sa nasapwan nga bangkay sang isa ka lalaki sa idalum sang tubig sa Sitio Puting Balas, Barangay Culasi, sining syudad kaina sang aga.
Nakilala lamang ang biktima sa pangalan nga alyas Dodoy sang Ahuy, Iloilo nga kahapon lamang nag-abot sa syudad sang Roxas para magtrabaho.
Ginpahayag ni Ruben dela Cruz sang Estancia, Iloilo, kaupod sang biktima nga antes ini nagtulog kagab-I nakita sini nga nag-inum pa si alyas Dodoy kag ang isa nila ka upod. Natukiban lamang nga kulang na sang isa ang mga kaupdanan sini matapos indi na makit-an ang presensiya ni Dodoy.
Ginaalegar nga nahulog ang biktima sang maglatay ini sa sakayan.
Nahibaluan nga maga-ubra kuntani sang guba nga sakayan pandagat nga palupad ang grupo ni dela Cruz kag kalakip kuntani diri ang napatay nga biktima.
Samtang suno naman sa panaysayon sang nagsalum sa tubig para kuhaon ang bangkay sang biktima nga mismo ang mga kaupdanan ni alyas Dodoy ang nagtudlo sa iya sang ginlugdangan sang biktima, rason nga madali sini nakuha ang lawas.
Apang ginahibalo sa karon sang mga otoridad kun may foul play ang kamatayon ni alyas Dodoy matapos nakita ang pilas sa liog kag likod kag nag-ilig diri ang dugo sang makuha na sa tubig.
Ba-se naman sa impormasyon sang pila ka mga residente nga may nakakita pa sa biktima sang ini ang mahulog sa sakayan kadungan ang iya pagkapay kapay sang kamot.
