CUARTERO, CAPIZ – Ginpasaka na subong nga adlaw ang sampaw-sampaw nga kaso batuk sa Barangay Kagawad nga nagpinalupok sang armas-luthang sa sulod sang binaylehan sang Abril 12 sang gab-i sa Sitio Dumalagan, Brgy. Carataya, Cuartero, Capiz.
Sa interview sang Bombo Radyo kay PCPT Alladin Talaban, Hepe sang Cuartero PNP, gin-file na sa korte ang kaso nga illegal discharge of firearms, paglapas sa Republic Act 10591 ukon Comprehensive Firearms and Ammunition Regulation Act kag bayolasyon sa Comelec Resolution no. 10918 in relation to Batas Pambansa Bilang 881 batuk sa amu nga opisyal sang Barangay.
Matandaan nga nagpinalupok sang armas-luthang sang makapila ka beses ang Barangay Kagawad nga ginkilala kay alyas Tom, 46-anyos bangud ginaalegar nga naakig ini nga wala malawag ang iya pangalan sa isa ka special dance number ukon honorary dance number.
Matapos nga nagpinalupok, gilayon ini nga gin-aresto sang kapulisan nga nagapatigayon sa amu nga tion sang police visibility sa lugar kag nakuha sa posisyon sang amu nga Barangay Kagawad ang isa ka yunit sang caliber .45 pistol kag narekober man sa lugar ang apat (4) ka basiyo sang bala.
Natukiban man nga yara sa impluwensya sang makahulubog nga ilimnon si Kagawad Tom kag suno kay PCPT Talaban sang mahimarasmasan na ang amu nga barangay official indi man ini makapati sa iya ginhimo nga pagpinalupok.
