Ginkwestyon ni Senador Francis “Kiko” Pangilinan ang padayon nga pagpungko ni Department of Public Works and Highways (DPWH) Secretary Manuel Bonoan sa tunga sang isyu sang ginaalegar trillion pesos nga flood control ghost projects.
Ginpanindugan ni Pangilinan nga trilyon pesos ang balor sang flood control ghost projects apang daw kaangay nga wala nahulag ang tiglikom kag sa gihapon wala naka-resign.
Wala man gindula sang senador ang posibilidad nga kaupod sa korapsyon si Bonoan sa mga anomaliya nga flood control projects.
Gani nga nagpanawagan si Pangilinan nga magtukod sang independiente nga komisyon nga maga-imbestigar sang mga anomalya nga proyekto.
Ginhatagan pagtamod sang senador ang importansya sang transparency, accountability, kag nagakaigo nga paggamit sang pundo sang publiko agud maproteksyunan ang pinaka-apektado nga mga komunidad batuk sa pagbaha.
Ginsuhestyon man sang senador nga pangunahan ang komisyon sang mga personalidad nga may kredibilidad kaangay nanday anay Ombudsman Conchita Carpio-Morales, anay DPWH Secretary Rogelio Singson, kag Baguio City Mayor Benjie Magalong.
Samtang, ginsuportahan man sini ang mando ni Presidente Ferdinand Marcos Jr., para sa lifestyle check sang tanan nga opisyal sang gobyerno, ilabi na sa tunga sang kontrobersiya angut sa flood control projects.
