Ginhangkat ni Senador Raffy Tulfo si Department of Health (DOH) Secretary Ted Herbosa nga tumanon ang iya promisa nga pahalinon si Food and Drugs Administration (FDA) Director-General Paolo Teston.
Ini matapos nga ginkumpirmar sang Senador sa iya privilege speech sa Senado nga gin-take down niya sa sulod lang sang pito ka adlaw ang mga produkto nga gin-flag sang FDA sa ila Public Health Warning Advisories nga delikado sa ikaayong lawas, apang ginabaligya sa gihapon sa online selling platforms.
Madumduman nga una na nga ginpakalain sang Senador ang FDA bangud sa padayon nga pagbaligya sang delikado kag unregistered health products online kadungan sang budget hearing sang DOH sadtong Oktubre 1.
Diri, ginkwestyon sang Senador kun ngaa nagapagwa sang health advisories ang ahensya kun wala man sila sang may ginahimo agud mapatuman ini.
Sa plenary budget debates sang Nobyembre 26, ginhangkat ni Sen. Tulfo si Herbosa nga siya mismo ang magapahalin sa hepe sang FDA kon indi pag-i-take down ang nasambit nga mga produkto, kag nagpasugot si Herbosa.
Tubtob subong, wala pa sang sabat si Sec. Herbosa angut sa posible pagpahalin sa hepe sang FDA.
