Senior Citizen, nga nagapatigayon sang ilegal nga pasugal, arestado sa syudad sang Roxas

Arestado ang isa ka senior citizen, matapos nga ginserbihan sang warrant of arrest sa barangay Bolo, Roxas City.

Ginkilala ang nadakpan kay alyas “Linda”, 65-anyos kag residente sang nasambit nga lugar.

Nagapangatubang ini sa kaso nga pagbayolar sa Presidential Decree No. 1602 ukon  “Illegal Gambling”.

Ang nasambit nga warrant ang gin-isyu kag gin-pirmahan ni Hon. Esperanza Isabel E. Poco-Deslate, Presiding Judge, Regional Trial Court, Sixth Judicial Region, Branch 19, Roxas City, Capiz kag napetsahan Pebrero 19, 2025.

Ginrekomendar naman sang korte ang balor P10,000.00 para sa temporaryo sini nga kahilwayan.

Sa karon, yara na sa kustodiya sang Roxas City PNP ang amo nga akusado para sa nagakaigo nga disposisyon.