ROXAS CITY – Arestado ang 68-anyos nga mangunguma matapos nga ginserbehan sang warrant of arrest sang mga otoridad, sa Sitio Pangpang, Barangay Daga, Panay, Capiz.
Pinaagi sa gintingub nga puwersa sang Bauang, La Union PPO, PNP-Anti-Kidnapping Group Visayas Field Unit Iloilo Team, Regional Intelligence Unit-6 kag Panay MPS, natigayon nga maaresto ang akusado nga si Mario Balagot Billanes “alyas Estanislao” nga residente sang nasambit nga lugar.
Nagapangatubang sang kaso nga 3 counts of Rape si Billanes, kun sa diin ang warrant of arrest ang gin-isyu kag ginpirmahan ni Hon. Fortunato V. Panganiban, presiding Judge, Regional Trial Court, 1st Judicial Region, Branch 33, Bauang, La Union, napetsahan Nobyembre 4, 1993.
Wala sang ginrekomendar ang Korte nga piyansa para sa temporaryo nga kahilwayan sang akusado.
Sandig sa ginpaguwa nga impormasyon sang AKG-VFU sa ila Facebook page, natabo ang insidente sang 1993 kun sa diin ginaalegar ginhimuslan sang akusado ang iya himata.
Nahibaluan nga may gintan-ay sadto anay nga reward para sa pagkaaresto sa amu nga wanted person sa national nga lebel, sa idalom sang DILG Memo Circular No. 93-120 napetsahan Setyembre 2, 1993.
Sa karon, ginkustodiya ini sa Panay MPS, para sa nagakaigo nga disposisyon.
