Ginmanduan ni Sigma, Mayor Dante Rizal Eslabon ang mga opisyal sang 21 ka mga barangay sang banwa nga sundon ang Department of the Interior and Local Government (DILG) Memorandum Circular No. 2026-006 ukon “Anti-Epal” Policy.
Sa interview sang Bombo Radyo kay Mayor Eslabon, iya ginpahayag nga sa sulod sang duha niya ka tuig nga pagpangalagad bilang alkalde, ginadumilian na niya ang pagbutang sang nawong niya sa mga proyekto nga nahamtang sa mga barangay.
Suno sa iya, kinahanglanon ang pagpadayon sa Anti-Epal Policy agud mabalik ang nagakaigo nga dungog kag kredito sa pumuluyo nga amo ang matuod-tuod nga tag-iya sang pondo nga ginagamit sa mga proyekto.
Dugang pa sang natungdan, ang strikto nga pagpatuman sang Anti-Epal Policy sang Barangay mahimo mangin isa ka tikang agud mahibaluan ang mga nagalapas kag mahimo sini nga mareport gilayon sa barangay agud mapasabat sa indi pagsunod sa polisa.
