SIGMA, CAPIZ – Dismayado ang alkalde sang banwa sang Sigma matapos ang pag-iban sang Sangguniang Bayan sang P1.5-M nagikan sa P3-M nga ginpain nga pondo para sa road maintenance sa mga kabarangayan sa banwa sang Sigma, Capiz.
Ini ang ginpahayag ni Mayor Christopher Andaya sang mainterview sang Bombo Radyo Roxas.
Suno kay Andaya nga ginpa-aprubahan sini sa ginpatigayon nga Municipal Development Council Meeting sang Sangguniang Bayan ang 2021 Budget kalakip ang P3-M nga pondo para sa road maintenance ukon pagpatambak sang lapok sa 21 ka mga kabarangayan nga sakop sang nasambit nga banwa apang wala sini nauyunan ang paglain sang programme kun sa diin gin-ibanan sang Sangguniang Bayan sang P1.5-M ang pondo para sa road concreting ukon pagpasemento sang dalan kag ang nabilin nga P1.5-M ang para sa pagpatambak sang lapok sa karsada.
Ginpahayag pa sang alkalde nga gin-veto na sini ang ginbuhat sang SB kag luyag niya sini nga mapasabat ang tanan nga mga responsable sa amo nga hitabo.
