Naglapta sa karsada ang 50 tanan ka sako sang mais matapos nagbaliskad ang isa ka truck sa Barangay San Agustin, Dumalag, Capiz.
Ginkilala ang driver sang truck nga si alyas “Edmir”, 32-anyos kag residente sang Brgy. San Rafael sang nasambit nga banwa kaupod ang wala na ginhingadlan nga pito ka mga pahinante.
Sa nakuha nga impormasyon sang Bombo Radyo nagikan sa Dumalag MPS, sa inisyal nga imbestigasyon nga ginhiwat sang mga otoridad, ginpahayag nga nagikan ang amo nga truck sa San Martin sang nasambit nga banwa kag magapadulong kun tani sa banwa sang Dumalag apang nadiparahan nalang sang driver nga wala na sang preno ang iya ginamaneho nga truck nga kun sa diin nadulaan ini sang kontrol rason nga natumba ini.
Samtang, madinalag-on naman nga nakuha ang nasambit nga truck kag maswerte nga wala sang napilasan nga casualties sa lugar apang, nag-angkon naman sang minor nga pilas ang driver kag kaupod sini nga mga pahinante nga madasig naman nga ginpadangat sa ospital.
Sa karon, padayon pa nga nagapabulong sa isa ka pribado nga ospital ang driver sang amo nga truck kaupod ang pito sini ka mga kaupdanan nga pahinante.
