ROXAS CITY – Liwat nga magabalik sa pagpakig-awat ang isa ka soldado nga capizeño nga napilasan sa Marawi siege sa oras nga mag-ayo na ang iya nga pilas.
Sa exclusive interview sang Bombo Radyo kay Corporal Roy Dueño sang 15th Infantry Battalion Philippine Army, ginpahayag sini nga temporaryo lamang ang iya nga pagpahuway sa pagpakig-away sa maute terror group sa Marawi City matapos naigo sang M203 grenade launcher samtang yara sa kainitan sang ila nga engkwentro.
Nagpanindugan si Dueño nga indi upang ang naangkon nga pilas para magbag-o ang iya nga pinsar kag kalimtan na lamang ang pagiging soldado, bangud mas nag-isog ini kag luyag nga mahatagan sang katumanan ang handum sang gobyerno nga mapapas na ang maute terror group agud magbalik na ang katawhayan sa Marawi City.
Samtang, ginpabugal man ni Dueño nga amat amat na nga nabawi sang militar ang pila ka mga barangay sa syudad sang Marawi kag indi magdugay malutos na ang maute terror group.
