ROXAS CITY – Magasugod na ang strikto nga implementasyon sang ‘No Helmet, No Driving Ordinance of Roxas City’ sa Agosto 1, 2023.
Ini ang ginkumpirmar ni Mr. Gonzalo Andrada, pinuno sang Traffic Management Unit (TMU) sang mainterview sang Bombo Radyo.
Suno diri, maga-isyu na sang citation ticket ang TMU personnel sa mga motorista nga una na ginpaandaman nga magsuksok sang helmet kun nagabiyahe.
Pahayag ni Andrada nga bastante na ang tion nga ginhatag agud ma-remind kag ipahibalo sa mga motorista ang implementasyon sang nasambit nga ordinansa.
Makit-an man suno diri, ang amat-amat nga pagbag-o kag pagsunod ilabi na kadam-an sa mga nagabiyahe ang nagasuksok na sang helmet.
Yari ang penalidad sa madakpan nga naglapas sa ordinansa:
1st offense – P500
2nd offense – P1,000
3rd offense – P3,000
4th offense – P5,000
Kaangut diri, ginklaro man ni Andrada nga kinahanglan man nagasuksok sang helmet ang back rider bilang proteksyon sa wala ginalauman nga aksidente sa dalanon.
Gintuad man sini, nga pagadumilian na ang pagsakay ukon pag-angkas sa mga kabataan nga indi malab-ot ang footrest kag indi sarang makahawid sa hawak sang drivers sandig sa layi.
Samtang, ginhatagan naman sang mandato ni Andrada ang tanan nga TMU personnel nga magbakal kag maggamit sang helmet bangud indi sini pag-i-tolerar ang mga nagalapas sa ordinansa.
Nagakadapat suno diri, mangin ehemplo ang mga TMU Personnel sang mga motorista bangud sila ang magapatuman sang ordinansa.
