ROXAS CITY – Yara na sa kostodiya sang Roxas City PNP ang isa ka motorsiklo nga gin-motornap sa Barangay Tanque, Roxas City.
Nadakpan sang mga tanod sang Barangay Punta Tabuc kag Tanque ang ginmotornap nga motorsiklo ni certain Aileen, residente sang Barangay Tanque sang suspek nga si Esedro Verano alyas Nonoy sang Tanque Ilaya.
Sandig sa imbestigasyon sang kapulisan nga naglakat si Aileen sang Domingo nga adlaw para magkumpanyar sa lubong sang iya himata.
Ginbilin sini ang iya motorsiklo sa guha sang ila balay.
Posible nakakita sang kahigayunan ang suspek nga si Verano kag iya ini ginmotornap kag nagpadulong sa banwa sang Tapaz.
Apang ginkatingala sang ugangan nga babaye sang suspect nga residente sang Barangay Punta Tabuc sang nagpauli sa ila ang umagad nga may yara na sang ginasakyan nga motorsiklo.
Bangud nagduda ini kag nabatian nga may ginmotornap nga motorsiklo rason nga iya ini ginsugid sa tanod nga gilayon nagpangusisa tobtob nahibaluan nga ang tag-iya sang motor amo si certain Aileen.
Yara na karon sa kostodiya sang Roxas City PNP si Verano kag ginaproseso naman sang tag-iya ang papeles para mabalik na sa iya ang motorsiklo nga ginmotornap sang suspek.
