ROXAS CITY – Yara na sa kustodiya sang mga kapulisan ang suspek nga ginaalegar nagpanglabo sa Purok 3, Barangay Libas, Roxas City.
Ini matapos nga boluntaryo nga nagsungka ang suspek nga si John Philip Arroyo kay Punong Barangay Richard Arrojado sang amo nga barangay kag ginturn-over ini sa Roxas City Police Station.
Hugot naman nga ginpanginwala sang nasambit nga opisyal ang nagalapta nga alegasyon nga ginapahayag nga gintago sini ang nasambit nga suspek.
Base sa inisyal nga imbestigasyon sang Roxas City Police Station nga samtang nagainom ang biktima nga si Jungie Navalez 19-anyos sang nasambit nga lugar sa balay sang iya abyan nga si Hans Isiderio sang hinali na lamang nga nagtuhaw kag ginapangita sang suspek sa diin ginaalegar nga ginahangkat ini sang away.
Bangud diri, nagguwa ang biktima apang wala sini ginalaoman nga nagapanago ang suspek sa madulom nga porsyon kun sa diin hinali na lamang ini nga ginlabo ang biktima gamit ang binangon.
Nag-angkon naman sang pilas sa lawas si Navalez nga gilayon naman gindala sa ospital agud dapatan sang nagakaigo nga pagbulong.
