ROXAS CITY – Nagapabilin nga palamangkutanon sa tag-iya sang isa ka puluy-an kung sa diin nagikan ang kalayo matapos nga nasunog ang ila sini nga balay sa Sitio Carmelite Brgy. Lawaan, Roxas City, Capiz.
Matandaan nga totally burned ang puluy-an nga ginapanag-iyahan ni Elessa Basoy Alvarez, 55-anyos matapos nga gintupok sang kalayo.
Sa interview sang Bombo Radyo kay Alvarez, ginpahayag sini nga sang natabo ang insidente nagapanglaba ini sa guha sang ila balay kag sa iya pagsulod sa sala iya na lamang nakit-an nga nagadaba-daba na ang kalayo sa isa ka kwarto.
Bangud sini, gilayon niya nga gintsekyar kag ginsiguro ang iya 5 tanan ka mga apo agud ipaguha kag nagpangayo sang bulig sa mga kaiping nga balay.
Ginklaro man sang tag-iya nga indi pa matul-id kung matuod nga ang paghampang sang lighter sang mga kabataan ang gintunaan sang sunog bangud suno sa iya nagahampang ang mga ini sang cellphone sa pihak nga hulot.
Mahibaluan nga 3 ka mga pamilya ang nagapuyo sa amu nga balay kung sa diin sa kabug-usan may yara sang 11 tanan ka mga indibidwal.
Ginabulubanta nga yara sa kapin mas ukon menus P25,000 ang ginbilin nga halit sang sunog kung sa diin human sa light materials ang puluy-an rason nga madasig nga naglapta ang kalayo.
Sa karon, padayon pa ang imbestigasyon sang mga katapo sang BFP kun ano ang matuod nga gintunaan sang sunog.
