TAPAZ, CAPIZ- Ginalauman nga ma-upgrade sa Level 1 ang Tapaz District Hospital nga nahamtang sa Barangay Switch, Tapaz, Capiz agud mas madamo pa nga serbisyo ang mahatag sa publiko.
Sa interview sang Bombo Radyo kay Dr. Jean A. Gloria, Chief of Hospital I sang Tapaz District Hospital, iya ginpahayag nga sa subong padayon nga nagadamo ang pasyente nga ila gina-akomodar.
Suno kay Dr. Gloria, ang Tapaz District Hospital may yara lang sang aprobado nga 25 bed capacity, apang sang ginpatuman ang no refusal policy, naglapaw ang numero sang pasyente sa limitado lang kuntani nga kapasidad sang ospital.
Pahayag niya, kun kaisa nagalab-ot ang ospital sa 160% occupancy rate.
Sa subong, isa ka infirmary nga ospital pa lamang ang Tapaz District Hospital sa diin may mga serbisyo pa nga indi mahatag sa mga pasyente kaangay sang pagtughong sang dugo, pag-opera, pag-admit sang pasyente nga na-stroke, kag pagpabata sang mga G1 kag G6 ukon ang yara sa high risk pregnancy nga mga pasyente.
Dugang pa sang natungdan, apisar may mga limitado nga serbisyo ang ospital, madamo sa gihapon nga mga pasyente ang ila napaayo kag mas madamo sang mga serbisyo ang mahimo nga ma-avail sang mga pasyente kaangay sang general medicine, general pediatrics, neo-natal services, OB-Gyne Services, minor surgeries, kag iban pa.
Interviewed by Bombo Jessa Mae Siman De Los Santos
