Lakip sa newly identified drugs watchlist ang mga target sang buy-bust operation sa Barangay Dayao, Roxas City.
Ang nadakpan amo si alyas Maymay yara sa legal nga pang-edaron kag bana sini nga lunsay residente sang nasambit nga barangay.
Sa interview sang Bombo Radyo kay Punong Barangay Wenie Batuampo, iya ginpahayag nga madamu na sang reklamo sa mga pumuluyo ang amo nga mag-asawa bangud apisar kaagahon may yara sang nagapadulong sa ila sini nga balay nga ngatuga sang distorbo.
Suno kay Punong Barangay Batuampo, nakuha sa paghinakop sang mga target ang duha ka sachet sang ginapatihan iligal nga droga nga ginabanta nagabug-at sang 9 grams kag may street value nga P61,200, drug paraphernalia kag P3,000 nga buy-bust money.
Pahayag pa niya, si alyas Maymay ang una na nga ginpaidalum sa rehabilitation sa syudad sang Bacolod apang wala sini gintapos kag nagpalagyo.
Dugang pa sang natungdan, yara na sa kustodiya sang kapulisan ang mga nasambit nga durugista kag pagapasakaan sang nagakaigo nga kaso.
