ROXAS CITY -Ginkumpirma ni Capiz Governor Esteban Evan Nonoy Contreras nga ginbaton na sang pila ka mga anay gobernador sa probinsiya ang gintanyag sini nga offer nga mangin kabahin sang Capiz Council for Local Governance.
Nadesisyunan sini nga magtukod sang nasambit nga konseho nga ginabug-usan sang mga anay gobernador sang probinsiya agud makabulig sa administrasyon sa pagdihon sang pila ka mga tikang nga makahatag sang maayo nga serbisyo sa mga Capizeño.
Nagapati ang opisyal nga bilang mga anay gobernador sang probinsiya madamo sila sang mga experiensiya nga makabulig sa ginapatuman nga mga programa kag proyekto sang karon nga administrasyon.
Nahibaluan man nga indi na kinahanglan nga pahamtangan sang opisina sa kapitolyo probinsiyal ang Capiz Council for Local Governance, bangud tuyo lamang sini nga may council nga mahimo makunsulta ang gobernador sa ginapalab-ot nga concern ukon problema sang magkatuhay nga sektor sa sosyudad.
Ginatun-an man sa karon sang administrasyon ang posible mabaton nga sweldo sang magabug-os sa nasambit nga council.
Kalakip sa mga anay gobernador nga handaan nga magbulig sa Contreras administration amo sanday anay governors Ting Borda, Vicente Bermejo kag Victor Tanco Sr.
Samtang wala pa sang ginapalab-ot nga sabat ang kampo ni anay governor Antonio del Rosario kun maga-upod ini sa gintukod nga Capiz Council for Local Governance.
