ROXAS CITY – Samaron ang tatlo ka mga persona matapos aksidente nga nabungguan sang isa ka ginamaneho nga tricycle ang motorsiklo nga ginamaneho man sang isa ka persona sa Barangay Dinginan, Roxas City.
Ginkilala ang mga napilasan nga sanday Marwen Elep, 25 anyos, driver sang Suzuki nga motorsiklo kag residente sang nasambit nga barangay; 2 ka mga menor de edad nga sakay sang Honda TMX 125 nga tricycle kag residente sang Barangay Sibaguan kag Balijuagan sining syudad.
Sandig sa imbestigasyon ni Police Senior Master Sergeant Anthony Bibit, traffic investigator sang Roxas City Police Station, sakay ang duha ka mga menor de edad sa ginamaneho nga tricycle sang hinali nga nahulog sa manubo nga porsyon sang dalan ang side wheel sang tricycle rason nga nadulaan ini sang kontrol sa pagmaneho kag aksidente nga nabungguan sa pihak nga lane ang motorsiklo nga ginamaneho ni Elep.
Bangud sini, nag-angkon sang mga kasamaran ang tatlo ka mga persona kun sa diin madasig nga ginrespondehan sang Capiz Emergency Response Team (CERT).
Madasig nga ginpadangat sa magkatuhay nga mga ospital ang mga napilasan para sa dugang nga pagbulong.
