ROXAS CITY, CAPIZ – Hugot nga ginpanginwala sang pamunuan sang Traffic Management Unit Roxas City ang mga aleagsyon nga ginahaboy sa ila may kaangtanan sa pagpangkumpiskar sang drivers license sa mga nakabayolar nga mga drivers sa syudad sang Roxas.
Sa interview sang Bombo Radyo kay Mr. Gonzalo Andrada, Head sang Traffic Management Unit Roxas City, ginpahayag nga wala sang kamatuuran ang ginahaboy nga alegasyon sa ila ni certain “Warren” nga isa ka katapo sang Land Transportation Office.
Dugang pa sini, ginahulam lamang sang mga Traffic Auxillary ang Driver’s License sang mga nagkaladakpan nga nagabayolar nga mga drivers agud makuha ang impormasyon nga inog-butang sa ticket kag ginabalik naman ini sa tion nga matapos na ang pagkuha sang amu nga mga impormasyon.
Nahibaluan nga ang Department of Interior and Local Government (DILG) ang nagpapanaog sang isa ka joint memorandum order kun sa diin ang otorisado lang nga makakumpiskar sang driver’s license amu ang mga deputized personnel sang Land Transportation Office (LTO), Philippine National Police (PNP) kag Highway Patrol Group (HPG).
Samtang, nagpalab-ot naman sang mensahe si Andrada sa mga nagabutang-butang sa ila nga ipalab-ot sa ila nga talatapan ang kasubong nga sitwasyon kag gilayon nga kwaon ang pangalan sang amu nga katapo sang ila nga talatapan agud mahatagan sang nagakaigo nga solusyon.
